حل الفنان حمزة نمرة ضيفاً على الإعلامي عمرو الليثي في سهرة خاصة على هامش إحيائه حفله الأخير في محكي القلعة، حيث كشف خلال الحلقة العديد من الأسرار عن حياته الخاصة، وتحدث للمرة الأولى عن علاقته بزوجته وموقفه من التمثيل، مؤكدًا: "أنا شايف مش لازم المطرب يكون ممثل أصلًا، ليه أمثل يعني"، وأضاف: "أنا مش شايف نفسي أنفع في التمثيل أصلا".
وتابع: "أنا بحب أتفرج على الأفلام والمسلسلات، وأحب مشاهدة ممثلين عظماء زي أحمد ومحمود عبد العزيز ونور الشريف دول ناس محترفين تمثيل ويظهروا لي إن التمثيل صنعة، أنا اتكسف إني أمثل في حضرة ناس عظماء زي دول".
وأكمل حمزة: "أنا هدفي مش التمثيل أنا بحب المزيكا وبحس إنها بتعبر عني أفضل ما يكون ومش مفتقد تعبير إضافي علشان أبقى ممثل".
لافتاً: "الحبايب اللي ماليين عليّ حياتي هم مراتي وأولادي وإخواتي وأصدقائي القليلين أوي، ومع الوقت حسيت إن فيه أولويات مهمة جدًا بعيدًا عن الشغل وأنا محتاج طول الوقت الحفاظ على علاقتي بيهم".
وأشار:"غنيت لمراتي الوقعة الأخيرة وغروب، بس مبطلعش أقول على الإنترنت، علاقتي بمراتي فيها خصوصية مش بحب تكون على المشاع".
وقال الفنان حمزة نمرة: "أنا بني اَدم طبيعي عندي مشاعر وبحس، لكن الغريب إن بعض الناس بتخلط ما بين شعور التعاطف والكآبة، بالعكس أنا الشجن اللي بقدمه في الأغاني بتاعتي حاجة راقية بترقق قلب الإنسان".
وتابع: "إذا كنت بحسس الناس بنوع من الشجن فهذه حاجة حلوة مش العكس، لو فيه أغنية حسستني بحالة من الشجن لدرجة إني دمعت دي مش حاجة وحشة ولكنه شعور إنساني جدًا لإن الإنسان هو خلطة من مشاعر كتير".
وأضاف: "أنا في الأغاني بتاعتي بقدم طول عمري كل الألوان اللي فيها شجن والمفرحة، ومن سنين كانوا بيقولوا عليّ مطرب التنمية البشرية بعد لما قدمت أغنية إنسان، وهي أغنية تعتبر سعيدة".
واختتم حمزة نمرة حديثه قائلاً: "مش شرط كل أغنية تنجح يبقى فيه لون معين للمطرب خلاص يتزنق فيه، وأنا مؤمن بنفسي إني مش مزنوق في لون معين لإني بقدم أنماط كتير وبحاول أنوع في الفن اللي بقدمه، والأهم إن الفن يكون صادق وبيوصل للناس".
إرسال تعليق